അതിശയിക്കുക! ഡോ. സോമനാഥ്

ഏപ്രിൽ 25: ISRO മുൻ ചെയർമാൻ ഡോ. എസ് സോമനാഥ് നൽകിയ ഉത്‌ഘാടക പ്രസംഗത്തിന്റെ പ്രസക്ത ഭാഗങ്ങളും, മറ്റു പ്രഭാഷണങ്ങളുടെ ചുരുക്കവും.

ഇവിടെ കുട്ടികൾ സന്നിഹിതരാണെന്ന് എന്നതുകൊണ്ടാണ് ഞാൻ ഇവിടെ വരാം എന്ന് തീരുമാനിച്ചത്. നമ്മെ നാമാക്കുന്നത് കുട്ടിക്കാലത്തു നാം വായിക്കുന്ന പുസ്തകങ്ങളും, നാം പരിചയപ്പെടുന്നവരും, അവരുടെ വാക്കുകളും മറ്റുമാണ്. സമൂഹത്തിന്റെ സഹായത്തോടെ നാം നേടുന്ന അറിവും ശേഷികളും സമൂഹത്തിന് തിരിച്ചു നൽകുക എന്നത് നമ്മുടെ ഉത്തരവാദിത്വമാണ്.

എങ്ങിനെയാണ് നമുക്ക് ശാസ്ത്രത്തോട് താത്പര്യം ഉണ്ടാകുന്നത്? അതിശയിക്കാനുള്ള കഴിവുണ്ടാകുമ്പോഴാണ് അത് സംഭവിക്കുന്നത്. അതിശയിക്കാൻ കഴിവുള്ളവർക്ക്, ചുറ്റും നോക്കി കാര്യങ്ങൾ മനസ്സിലാക്കാനും കൂടുതൽ അറിയാനും കഴിയും. അങ്ങിനെ കൂടുതൽ കൂടുതൽ അറിയുമ്പോഴും അതിശയിക്കുമ്പോഴും നമുക്ക് മനസ്സിലാകും, അതിശയിക്കാനല്ലാതെ മറ്റൊന്നിനും നമുക്ക് കഴിയില്ല എന്ന്!

ഈയടുത്ത് "എഡ്ജ് ഓഫ് നോളഡ്ജ്" (Edge of Knowledge)എന്ന ഒരു പുസ്തകം ഞാൻ വായിക്കുകയുണ്ടായി. സമയം (time), സ്ഥലം (space), ദ്രവ്യം (matter), ജീവൻ (life), ബോധം (consciousness) എന്നീ സങ്കൽപ്പങ്ങളും അവയുടെ അപേക്ഷികതയുമാണ് അതിന്റെ പ്രതിപാദ്യ വിഷയം. എന്റെ ഇന്നത്തെ സംസാരം അതിനെ ചുറ്റിപ്പറ്റിയാകാം, അതിൽ നമുക്ക് അതിശയിക്കാൻ വകയുണ്ടായേക്കാം.

19-ആം നൂറ്റാണ്ടിന്റെ തുടക്കത്തിൽ ശാസ്ത്രത്തിന് ഇനി ഒന്നും കണ്ടെത്താനില്ലെന്നും, അപേക്ഷികതയും ക്വാണ്ടം സിദ്ധാന്തവും ഉപയോഗിച്ച് പ്രതിഭാസങ്ങളുടെ വിശദീകരണം, ആറാം ദശാംശത്തിന്റെ വിശദീകരണം എന്നിവ മാത്രമേ ഇനി ശാസ്ത്രത്തിന് ചെയ്യാനുള്ളൂ എന്നുള്ള അഭിപ്രായങ്ങൾ ഒക്കെ ഉയർന്നിരുന്നു. പക്ഷെ, ഇന്നും നമുക്ക് ഉത്തരങ്ങളും ചോദ്യങ്ങളും അവശേഷിക്കുന്നു എന്നതാണ് യാഥാർത്ഥ്യം. എന്തുകൊണ്ട് നമ്മൾ? എന്തുകൊണ്ട് ജീവിതം? എന്നിങ്ങനെ ഉത്തരം കിട്ടാത്ത എത്ര എത്ര ചോദ്യങ്ങൾ!

മനുഷ്യന് സമയം അറിയുവാനുള്ള കഴിവ് ഉണ്ടോ? നമ്മുടെ ശരീരത്തിൽ ഒരു ഘടികാരം പ്രവർത്തിക്കുന്നുണ്ടോ? ചിലർ പറയുന്നു, നമുക്കുള്ളിൽ ഒരു ജൈവഘടികാരം (biological clock) ഉണ്ടെന്ന്. അങ്ങിനെയെങ്കിൽ, അത് സ്ഥിരതയുള്ളതാണോ? അത് എപ്പോഴെങ്കിലും നിന്ന് പോകാറുണ്ടോ? നാം ഉറങ്ങുമ്പോൾ അത് നിലക്കുന്നു! സൂക്ഷ്മമായി മനസ്സിലാക്കിയാൽ അത് ഒരു രാസഘടികാരം ആണെന്ന് മനസ്സിലാകും. ആവശ്യങ്ങൾക്കും സാഹചര്യങ്ങൾക്കും അനുസരിച്ച് പ്രവർത്തിക്കുന്ന ഒരു രാസപ്രക്രിയയാണത്. അതിനെ ഒരു യാന്ത്രികഘടികാരവുമായി (mechanical clock) താരതമ്യം ചെയ്യാൻ കഴിയില്ല.

ഇനി നമുക്ക് മനുഷ്യന്റെ സ്ഥലത്തെ (space) അറിയുവാനുള്ള കഴിവിനെക്കുറിച്ച് ആലോചിക്കാം. നമുക്ക് എത്ര മാനങ്ങൾ (dimensions) കാണാനുള്ള കഴിവുണ്ട്? യഥാർത്ഥത്തിൽ നമ്മുടെ കണ്ണുകൾക്ക് ദ്വിമാനങ്ങൾ (2D) കാണാനുള്ള കഴിവേ ഉള്ളൂ. നമ്മുടെ രണ്ടു കണ്ണുകളുടെ കാഴ്ച്ച ഉപയോഗിച്ച് മൂന്നാമത്തെ വശം (3D) നാം അനുമാനിക്കുകയാണ്. ഇത് നമുക്ക് ലളിതമായി പരീക്ഷിക്കാവുന്നതാണ് - ഒരു കണ്ണ് അടച്ചു വച്ചുകൊണ്ട് ഒരു ബിന്ദുവിൽ തൊടാൻ ശ്രമിച്ചാൽ നമ്മുടെ കൃത്യത കുറയുന്നതായി നമുക്ക് മനസ്സിലാകും. നാം മൂന്നാമത്തെ മാനം, അഥവാ വശം, രണ്ട് കണ്ണുകളും തരുന്ന ദ്വിമാന ദൃശ്യങ്ങൾ ഉപയോഗിച്ച് സൃഷ്ടിക്കുകയാണ്. പക്ഷെ, ഈ പ്രപഞ്ചം എത്രയോ മാനങ്ങൾ (dimensions) ഉള്ളതാണ്! അവ നേരിട്ട് മനസ്സിലാക്കാനുള്ള കഴിവ് നമുക്കില്ല - ചില പൊതു ധാരണകൾ ഉപയോഗിച്ചാണ് നാം കാര്യങ്ങൾ മനസ്സിലാക്കുന്നത്.

എന്താണ് മനുഷ്യന്റെ ഒരു ദിവസം? അത് ഭൂമി ഒരു തവണ സ്വയം തിരിയുന്നതുമായി ബന്ധപ്പെട്ടിരിക്കുന്നു. ഇപ്പോൾ അത് 24 മണിക്കൂർ കൊണ്ട് ഒരു തവണ സ്വയം തിരിയുന്നു, അതുകൊണ്ട് നമ്മുടെ ഒരു ദിവസം 24 മണിക്കൂർ ആയിരിക്കുന്നു! ഈ ആപേക്ഷികത നാം നന്നായി തിരിച്ചറിയേണ്ടതുണ്ട്. ന്യൂട്ടൻ അവതരിപ്പിച്ച ചലന നിയമങ്ങൾ ആപേക്ഷികമാണെന്ന് എയ്ൻസ്റ്റീൻ അവതരിപ്പിച്ച ആപേക്ഷികതാ സിദ്ധാന്തം കൂട്ടിച്ചേർത്തു. ക്വാണ്ടം (കണികാ) ഭൗതികം അതിനേക്കാൾ ഗഹനമായ വിശദീകരണങ്ങൾ നമുക്ക് തന്നു. ഇവയെയെല്ലാം പ്രപഞ്ചത്തെ നാം നോക്കിക്കാണുന്ന വിവിധ വീക്ഷണങ്ങൾ (perception) ആയി നമുക്ക് മനസിലാക്കാം.

നാം പറഞ്ഞു വരുന്നത് നമുക്ക് ചുറ്റും പല സമയങ്ങൾ ഉണ്ട് എന്നതാണ്! ഭൂമിയിലെ സമയമല്ല നാം വിക്ഷേപിച്ച ഒരു ഉപഗ്രഹത്തിലെ സമയം. വേഗതയും സമയവും തമ്മിലുള്ള ബന്ധം എന്താണ്? വേഗത കൂടുമ്പോൾ സമയം പതുക്കെയാകുന്നു. ഒരു ഉപഗ്രഹം ഭൂമിയെക്കാൾ വേഗത്തിൽ സഞ്ചരിക്കുന്നതിനാൽ അതിനുള്ളിലെ സമയം ഭൂമിയിലെ സമയത്തേക്കാൾ പതുക്കെയേ നീങ്ങുകയുള്ളൂ. ഇതുപോലെയാണ് ഗുരുത്വാകർഷണവും സമയവും തമ്മിലുള്ള ബന്ധവും. ഭൂമിയെക്കാൾ ഭാരമുള്ള ഒരു ഗ്രഹത്തിൽ ഭൂമിയെക്കാൾ പതുക്കെയാവും സമയം നീങ്ങുക.

പല സമയങ്ങൾ ഉണ്ട് എന്ന അറിവും അവ തമ്മിലുള്ള ബന്ധവും, വ്യത്യാസവും മനസ്സിലാക്കാതെ GPS (Global Positioning System) പോലെയുള്ള സാങ്കേതിക വിദ്യകൾ ഉണ്ടാക്കാൻ സാധ്യമായിരുന്നില്ല. ഭൂമിയിലെ സമയവും നാം വിക്ഷേപിച്ച ഉപഗ്രഹങ്ങളിലെ സമയവും താരതമ്യം ചെയ്താണ് GPS പ്രവർത്തിക്കുന്നത്. താരതമ്യത്തിലെ ഒരു മൈക്രോസെക്കൻഡ് പിഴവിന് GPS സംവിധാനത്തിൽ നൂറു കണക്കിന് മീറ്റർ തെറ്റ് വരുത്താൻ കഴിയും!

എയ്ൻസ്റ്റീൻ നമുക്ക് വെളിവാക്കിത്തന്നത് സമയത്തിന്റെ ഈ അപേക്ഷികതയാണ്. ആപേക്ഷികതാ സിദ്ധാന്തം വേഗത്തിനും ഗുരുത്വാകർഷണത്തിനും ആപേക്ഷികമായാണ് സമയം നില നിൽക്കുന്നത് എന്ന ബോധം നമുക്ക് തന്നു. പ്രപഞ്ചത്തിൽ പല സമയങ്ങൾ നിലനിൽക്കുന്നു! പ്രപഞ്ചത്തിന്റെ ഉത്പത്തിയിൽ ഒരു സമയം, സൂര്യനിൽ ഒരു സമയം, നമ്മുടെ ഭൂമിയിൽ മറ്റൊരു സമയം, ഓരോ തമോഗർത്തങ്ങളിലും (black hole) വേറെ വേറെ സമയങ്ങൾ, ശൂന്യതയിൽ ഇതൊന്നുമില്ലാത്ത മറ്റൊരു സമയം. ഇത് നമ്മെ വിസ്മയിപ്പിക്കുന്നില്ലേ? നമ്മുടെ ധാരണകൾ ആപേക്ഷികങ്ങളാണെന്ന് തിരിച്ചറിയാൻ ഇത് നമ്മെ സഹായിക്കുന്നില്ലേ?

പ്രപഞ്ചത്തിന്റെ ആരംഭത്തെ കുറിച്ചുള്ള ഏറ്റവും പ്രമുഖമായ സിദ്ധാന്തം മഹാവിസ്ഫോടന (big bang) സിദ്ധാന്തമാണല്ലോ. ഒന്നുമില്ലായ്മയിൽ നിന്ന് ഒരു വലിയ പൊട്ടിത്തെറിയിലൂടെയാണ് എല്ലാം തുടങ്ങിയത് എന്നാണ് അത് അവകാശപ്പെടുന്നത്. ഏതാണ്ട് 13.8 മില്ല്യൺ വർഷങ്ങൾക്ക് മുമ്പ് നടന്ന ഒരു പൊട്ടിത്തെറിയെക്കുറിച്ചാണ് നാം അനുമാനിക്കുന്നത്. ഇപ്പോൾ ചിന്തിച്ച് നോക്കൂ, ഏത് സമയത്തിലാവും ഈ വർഷങ്ങൾ നാം പറയുന്നത്?

നമുക്ക് ദ്രവ്യത്തെക്കുറിച്ചും (matter) അൽപ്പം ചിന്തിച്ചു നോക്കാം. മഹാവിസ്ഫോടനസമയത്ത് ഉർജ്ജമോ ദ്രവ്യമോ ഇല്ലാത്ത ഒരു അവസ്ഥയായിരുന്നു എന്ന് കരുതപ്പെടുന്നു. സത്യത്തിൽ നമുക്ക് ആ സ്ഥിതിയെപ്പറ്റി വലിയ അറിവൊന്നുമില്ല. എന്നാൽ, ക്വാണ്ടം സിദ്ധാന്തം ഉപയോഗപ്പെടുത്തിയുള്ള കണക്കു കൂട്ടലുകൾ വഴി അങ്ങിനെ ഒരു സ്ഥിതി സാധ്യമാണ് എന്ന് നമുക്ക് കണ്ടെത്താൻ കഴിഞ്ഞിട്ടുണ്ട്. മഹാവിസ്ഫോടനത്തിനടുത്തേക്ക് എത്തുമ്പോൾ, നമുക്ക് ആ അവസ്ഥയുടെ ഒരു വിവരവും ശേഖരിക്കാൻ കഴിവില്ലാത്തതുകൊണ്ട്, ശാസ്ത്രീയ കണക്കുകൂട്ടലുകൾ സാധ്യമല്ലാതെ വരുന്നു. ആ അവസ്ഥ ഗുരുത്വാകർഷണത്തിന്റെ പരകോടിയിലായിരിക്കണം, പ്രകാശത്തിന് പോലും പുറത്തേക്ക് വരാൻ കഴിയാത്തത്ര ശക്തിയിലുള്ള ഗുരുത്വാകർഷണം! പിന്നെങ്ങിനെ നമുക്ക് തെളിവുകൾ കിട്ടാൻ? എന്നാൽ ആ അവസ്ഥയെക്കുറിച്ചുള്ള ചിന്തകൾ നമ്മെ വിസ്മയിപ്പിക്കുന്നില്ലേ?

മഹാവിസ്ഫോടനത്തിന് ശേഷം എത്രയോ കോടി വർഷങ്ങൾക്ക് ശേഷമാണ് പ്രകാശത്തിന് പോലും ആ അവസ്ഥയിൽ നിന്ന് പുറത്തേക്ക് ഒഴുകാൻ കഴിഞ്ഞത്. നമുക്ക് പ്രകാശം പുറത്തേക്ക് വരുന്നതിന് മുമ്പുള്ള പ്രപഞ്ചത്തെ കുറിച്ചുള്ള തെളിവുകൾ ശേഖരിക്കാൻ കഴിഞ്ഞിട്ടില്ല, അതുകൊണ്ട് തന്നെ ആ അവസ്ഥയുടെ കാര്യങ്ങൾ മനസ്സിലാക്കാൻ നാം ഇനിയും കാത്തിരിക്കണം, നമുക്ക്‌ കണ്ടെത്തണം.

മഹാവിസ്ഫോടനസമയത്ത് വെളിവായ ദ്രവ്യവും ഉർജ്ജവുമെല്ലാം അനന്തതയിലേക്ക് അനുസ്യൂതം പടർന്നുകൊണ്ടിരിക്കുന്നു എന്ന് കരുതപ്പെടുന്നു. അവ വേഗത്തിൽ അകന്നു കൊണ്ടിരിക്കുക മാത്രമല്ല അവയുടെ അകൽച്ചയുടെ വേഗം കൂടിക്കൊണ്ടിരിക്കുകയും ചെയ്യുന്നു. കോടിക്കണക്കിന് വർഷങ്ങളായി ഈ പ്രതിഭാസം തുടരുകയാണ്. ആ വേഗത പ്രകാശത്തിന്റെ വേഗതയിലെത്തുമ്പോൾ എന്ത് സംഭവിക്കും? ക്വാണ്ടം സിദ്ധാന്തത്തിലധിഷ്ഠിതമായ കണക്കുകൂട്ടലുകൾ പറയുന്നത് പ്രകാശത്തിന്റെ വേഗതയിൽ വസ്തുക്കൾ അപ്രത്യക്ഷമാകും എന്നാണ്! അങ്ങനെയെങ്കിൽ ഒന്നുമില്ലായ്മ വീണ്ടും ഉണ്ടാകാം. ഇതും നമ്മെ വിസ്മയഭരിതരാക്കുന്നില്ലേ?

ഇംഗ്ലീഷ് സിനിമകൾ പലതരമുണ്ട്. ഇടക്ക് നല്ല സയൻസ് ഫിക്ഷൻ സിനിമകളും ഉണ്ടാവാറുണ്ട്. “Men in Black” അത്തരത്തിൽ ഉള്ള നല്ല ഒരു സിനിമയാണ്. ആ സിനിമയിൽ മറ്റൊരു ഗ്യാലക്സിയിൽ നിന്ന് ഒരാൾ ഭൂമിയിൽ വരുന്നുണ്ട്. അദ്ദേഹം ആ ഗ്യാലക്സിയുടെ രാജാവായിരുന്നു, ഇപ്പോൾ പ്രപഞ്ചത്തിൽ ആ ഗ്യാലക്സി കാണാനില്ല, അദ്ദേഹം തന്റെ ഗ്യാലക്സി തേടി ഇറങ്ങിയതാണ്. അവസാനം അദ്ദേഹം അത് കണ്ടെത്തുന്നത് ഒരു വളർത്തു പൂച്ചയുടെ കഴുത്തിൽ കെട്ടിയിട്ടിരുന്ന ഒരു വജ്രത്തിനുള്ളിലാണ്. ക്വാണ്ടം ഭൗതികശാസ്ത്രത്തിൽ തോത് (scale) അപ്രസക്തമാണ്.  അതായത് 10 ന്റെ 37 ആം അധികാരവും -37 ആം അധികാരവും സമമാകുന്നു (10 to the power of 37 = 10 to the power of -37). അപ്പോൾ സിനിമയിൽ പറയുന്ന അവസ്ഥ സാദ്ധ്യമാണ് എന്ന് വരുന്നു. ഇത് നമ്മെ വിസ്മയിപ്പിക്കുന്നില്ലേ?

ആണവ പ്രവർത്തനങ്ങൾ നടക്കുമ്പോൾ ന്യൂട്രിനോകൾ ഉണ്ടാകുന്നു. പണ്ടൊക്കെ അവ തരംഗങ്ങൾ ആണെന്നാണ് കരുതിയിരുന്നത്. എന്നാൽ അവക്ക് കണികാ സ്വഭാവവും ഉണ്ടെന്ന് ഇന്ന് നമുക്കറിയാം. സൂര്യനിൽ നിന്ന് നിരന്തരം ന്യൂട്രിനോകൾ സൗരയൂഥമാകെ പ്രവഹിച്ചുകൊണ്ടിരിക്കുന്നു. ഒരു സെക്കൻഡിൽ ഇത്തരം 10 മില്യൺ ന്യൂട്രിനോകളെങ്കിലും നമ്മുടെ ശരീരത്തിലൂടെ നാമറിയാതെ കടന്നുപോയ്ക്കൊണ്ടിരിക്കുന്നു. ഇത് നമ്മെ അത്ഭുതപ്പെടുത്തുന്നില്ലേ?

എങ്ങിനെയാണ് നക്ഷത്രങ്ങൾ ഇല്ലാതാകുന്നത്? ദ്രവ്യം (matter) പോലെ തന്നെ പ്രതി ദ്രവ്യവും (dark or anti matter) ഉണ്ട് എന്ന് കരുതപ്പെടുന്നു. അതുപോലെ ഊർജ്ജവും പ്രതി ഊർജ്ജവും (dark energy) നിലനിൽക്കുന്നുണ്ടത്രേ. പ്രപഞ്ചത്തിൽ ശൂന്യ ഇടങ്ങൾ ഉണ്ടാവാം എന്ന് പറഞ്ഞല്ലോ. അത് പോലെ കണങ്ങളും (particle) പ്രതി കണങ്ങളും (anti particle) നിലനിൽക്കുന്നു. എന്നാൽ ലോകം കണങ്ങൾ മാത്രം നിറഞ്ഞതാണത്രേ, പ്രതി കണങ്ങൾ ഇവിടെ പൊതുവെ കാണപ്പെടുന്നില്ല. എന്തുകൊണ്ട് ലോകം പ്രതി ദ്രവ്യത്താൽ  (dark matter) സംവിധാനിക്കപ്പെട്ടില്ല? ശാസ്ത്രത്തിന് ഇനിയും എന്തെല്ലാം കണ്ടെത്താനുണ്ട്.

ജീവൻ ഭൂമിയിൽ ഉണ്ടായതാണോ? അതോ, ജീവൻ ഭൂമിക്ക് വെളിയിൽ നിന്ന് ഇവിടെ എത്തിച്ചേർന്നതാണോ? ജീവൻ ആകസ്മികമായി ഉണ്ടായതാണോ? അതോ ജീവൻ ഒരു കാരണം കൊണ്ട് നിലനിൽക്കുന്നതാണോ? നമ്മുടെ കോശങ്ങളിൽ RNA (ribonucleic acid), DNA (deoxyribonucleic acid) എന്നിവ ഉണ്ട് എന്ന് നമുക്കറിയാം. അതുപോലെ ATP (Adenosine Tri Phosphate) എന്നൊരു ഘടകവും കോശങ്ങളിൽ ഉണ്ട്. ഇവ കോശങ്ങളിലെ ഊർജ്ജ സംഭരണികൾ ആയാണ് അറിയപ്പെടുന്നത്. ഭൂമിക്ക് വെളിയിൽ പലയിടത്തും ATP യുടെ സാന്നിദ്ധ്യം തിരിച്ചറിഞ്ഞിട്ടുണ്ട്. ഇത്തരം അറിവുകൾ ആസ്ട്രോ ബയോളജി (Astro Biology) എന്നൊരു ശാസ്ത്ര ശാഖക്ക് തന്നെ ജന്മം കൊടുത്തിരിക്കുന്നു.

അറിവ് നമ്മെ വിസ്മയിപ്പിക്കുകയും കൂടുതൽ അറിവ് നേടാനുള്ള ആഗ്രഹം നമ്മിൽ ജനിപ്പിക്കുകയും ചെയ്തുകൊണ്ടിരിക്കണം. നാം ഇടപെടുന്ന മേഖലകളിലെല്ലാം ഒളിഞ്ഞിരിക്കുന്ന അതിശയങ്ങൾ കണ്ടെത്താനും, അതിൽ വിസ്മയിക്കാനും നാം ശ്രമിക്കണം. അറിവ് കൂടുന്തോറും കൂടുതൽ അത്ഭുതപ്പെടുന്നവരും അറിവന്വേഷികളും ആയി നാം മാറണം. അതിശയിക്കുക എന്നതാണ് നമുക്ക് ചെയ്യാൻ കഴിയുന്ന ഏറ്റവും നല്ല കാര്യം!

NB: ശാസ്ത്ര തള്ള് science reel മത്സര വിജയികൾക്കും പങ്കെടുത്തവർക്കും ഡോ. എസ് സോമനാഥ്, തന്റെ പ്രസംഗത്തിന് ശേഷം സമ്മാനങ്ങൾ വിതരണം ചെയ്തു.

ഡോ. ഗീത (VSSC ഗവേഷണ വിഭാഗം, മുൻ മേധാവി)

ശാസ്ത്രം ആയിരക്കണക്കിന് സിദ്ധാന്തങ്ങൾ മുന്നോട്ടു വയ്ക്കുകയും അവയെ തെളിയിക്കാൻ ശ്രമിക്കുകയും ചെയ്തുകൊണ്ടിരിക്കുന്നു. എന്നാലും പ്രപഞ്ച സത്യത്തിന്റെ 0.1 ശതമാനം പോലും ഇതുവരെ അനാവരണം ചെയ്യപ്പെട്ടിട്ടില്ല. അതുകൊണ്ട് ചോദ്യങ്ങൾ ചോദിക്കുക, ചോദ്യങ്ങൾ ചോദിക്കുന്നതിനെ പ്രോത്സാഹിപ്പിക്കുക.

സാങ്കേതിക വിദ്യ എന്നാൽ ശാസ്ത്രം എങ്ങിനെ ഉപയോഗ്യമാക്കാം എന്നതാണ്. ഗതാഗതം, വിദ്യാഭ്യാസം, എന്നുവേണ്ട സർവ്വ മേഖലകളിലും ശാസ്ത്രത്തിന്റെ കണ്ടെത്തലുകൾ സാങ്കേതിക വിദ്യയായി ഉപയോഗപ്പെടുത്തിക്കൊണ്ടിരിക്കുന്നു. പക്ഷെ, ശാസ്ത്രവും സാങ്കേതിക വിദ്യയും രണ്ടാണ്. ശാസ്ത്ര തത്വങ്ങൾ ഉപയോഗപ്പെടുത്തിയാണ് സാങ്കേതിക വിദ്യകൾ വികസിപ്പിക്കുന്നത്.

ലക്ഷ്യങ്ങൾ തീരുമാനിക്കുകയും, അതിനു വേണ്ടി അക്ഷീണം പ്രവർത്തിക്കുകയും ചെയ്യുക. എപ്പോഴും പഠിച്ചുകൊണ്ടിരിക്കുക.

ശ്രീ. സാജൻ, ശാസ്ത്ര സാഹിത്യ പരിഷത്ത്, LUCA

പണ്ട്, പരിഷത്ത് 1960 കളിൽ 100 ചോദ്യങ്ങൾക്ക് ഒരു മാസം കൊണ്ട് ഉത്തരം കണ്ടെത്താൻ ഒരു മത്സരം സംഘടിപ്പിച്ചിരുന്നു. എന്റെ കുട്ടിക്കാലത്ത് അതിനുവേണ്ടി ഞാൻ ഒരുപാട് പുസ്തകങ്ങൾ വായിച്ചിരുന്നു. ഇന്ന് ഈ നിർമ്മിത ബുദ്ധിയുടെ യുഗത്തിൽ ഉത്തരങ്ങൾ കണ്ടെത്തുക അത്ര പാടുള്ള കാര്യമല്ല. എന്നാൽ ഉത്തരമില്ലാത്ത ചോദ്യങ്ങൾ കണ്ടെത്തുക വളരെ രസകരമായ ഒരു വെല്ലുവിളിയായിരിക്കും.

പരിഷത്ത് ഉത്തരം കണ്ടെത്താൻ പ്രയാസമുള്ള 100 ചോദ്യങ്ങൾ കണ്ടെത്താൻ ആഹ്വാനം ചെയ്യുകയാണ്. അതിനാൽ, ഉത്തരം കണ്ടെത്താൻ കഴിയാത്ത 10 ചോദ്യങ്ങൾ കണ്ടെത്താൻ ശാസ്ത്രവേദിയെ ഞങ്ങൾ ഒരു പന്തയത്തിന് ക്ഷണിക്കുന്നു.

1973 ൽ പ്രസിദ്ധീകരിക്കപ്പെട്ട ജേക്കബ് ബ്രോനൗസ്കി (Jacob Bronowski) യുടെ "The Ascent of Man" എന്ന പുസ്തകത്തിൽ രസകരമായ ഒരു വാചകമുണ്ട്: "That is the essence of science: ask an impertinent question, and you are on the way to a pertinent answer". അതായത്, തികച്ചും അപ്രസക്തങ്ങളായ ചോദ്യങ്ങളാണ് നമ്മെ വളരെ പ്രസക്തങ്ങളായ ഉത്തരങ്ങളിലേക്ക് എത്തിക്കുന്നത്!

ശാസ്ത്രത്തിന്റെ സാമൂഹിക മേഖലയിലെ ധർമ്മത്തെക്കുറിച്ച് ജെ ഡി ബെർനാൽ (J.D. Bernal) തുടങ്ങിയ പ്രമുഖർ വളരെ പണ്ട് തന്നെ നമ്മെ ബോധവാന്മാരാക്കിയിട്ടുണ്ട്. 1959 ശാസ്ത്ര സാഹിത്യ പരിഷത്തിന്റെ ഉത്ഭവം തന്നെ ഇത്തരം ചിന്തകളിൽ നിന്നാണ്. ശാസ്ത്രവും സാങ്കേതിക വിദ്യയും, സമൂഹത്തിൽ എങ്ങിനെ പ്രവർത്തിക്കണം എന്നത് നാം ശ്രദ്ധിക്കേണ്ട ഒരു വിഷയമാണ്.

ശാസ്ത്ര ബോധം (scientific temper) ഒരു സമൂഹത്തിന്റെ ഉന്നമനത്തിന് എത്രത്തോളം പ്രധാനമാണെന്ന് തിരിച്ചറിഞ്ഞ ക്രാന്ത ദർശികളിൽ അഗ്രഗണ്യനാണ് നമ്മുടെ ആദ്യ പ്രധാനമന്ത്രിയും സ്വാതന്ത്ര്യ സമര മുന്നണി പോരാളിയും രാഷ്ട്ര ശില്പിയുമായ ജവഹർ ലാൽ നെഹ്‌റു. ശാസ്ത്ര ബോധം കെടാതെ സൂക്ഷിക്കാൻ എല്ലാവരും മുന്നോട്ടു വരിക. ശാസ്ത്രവേദിയോടൊപ്പം അതിനുവേണ്ടി പ്രവർത്തിക്കാൻ പരിഷത്തും ഉണ്ടാകും, ആശംസകൾ.

പ്രൊഫ. കുര്യൻ ഐസക്, BSS (Breakthrough Science Society)

BSS അഖിലേന്ത്യാ തലത്തിൽ 30 വർഷത്തോളമായി പ്രവർത്തിച്ചു വരുന്നു. കേരളത്തിലും എല്ലാ ജില്ലകളിലും ഞങ്ങളുടെ സംഘടന പ്രവർത്തിക്കുന്നുണ്ട്. മാനവികതക്കും സമൂഹത്തിനും ശാസ്ത്രം ഉപയോഗപ്പെടുത്തുക, ശാസ്ത്രീയ ചിന്ത വളർത്തുക എന്നീ ലക്ഷ്യങ്ങളാണ് ഞങ്ങൾക്കുള്ളത്. ശാസ്ത്രവേദിയുടെ പ്രവർത്തനങ്ങൾക്ക് ഭാവുകങ്ങൾ, നമുക്ക് ഒരുമിച്ച് ഈ ലക്ഷ്യങ്ങളാക്കായി പ്രവർത്തിക്കാം.

ശാസ്ത്രവേദി ഈ അടുത്ത നടത്തിയ ശാസ്ത്ര തള്ള് science reel മത്സരങ്ങൾ ഞാൻ ശ്രദ്ധിച്ചിരുന്നു. കുട്ടികൾ ഇതിനായി ശ്രമിക്കുന്ന സമയത്ത് അവർക്ക് ഒരുപാട് പുതിയ ചോദ്യങ്ങൾ മനസ്സിൽ ഉണ്ടായിട്ടുണ്ടാവും. ശാസ്ത്രവേദി ആ ചോദ്യങ്ങൾ ശേഖരിക്കുകയും അവക്ക് ഉത്തരം കണ്ടെത്താൻ സഹായിക്കുകയും ചെയ്യുന്നത് കൂടി നന്നായിരിക്കും എന്ന് എനിക്ക് തോന്നുന്നു. അടുത്ത തവണ മത്സരത്തിൽ ഈ നിർദ്ദേശം കൂടി പരിഗണിക്കുക.

ശാസ്ത്രവേദി സംസ്ഥാന സമ്മേളനം 2025: ഏപ്രിൽ 25 - 26,ലെനിൻ ബലവാടി, തിരുവനന്തപുരം.

ശാസ്ത്രം, സമൂഹം, ഗാന്ധി: കവി, വി. മധുസൂദനൻ നായർ

ഏപ്രിൽ 25: സാംസ്‌കാരിക സന്ധ്യയെ ധന്യമാക്കിക്കൊണ്ട് പ്രശസ്ത കവി വി. മധുസൂദനൻ നായർ സർ നടത്തിയ പ്രഭാഷണത്തിൽ നിന്നും കിട്ടിയ ചെറു ശകലങ്ങൾ.

സംസ്കാരം സമൂഹത്തെ, മനുഷ്യനെത്തന്നെയും അരിച്ചെടുക്കുന്ന ഒരു പ്രക്രിയയാണ്. അത് ശാസ്ത്രീയമായ ഒരു പ്രക്രിയയാണ്. അതുകൊണ്ടു തന്നെ സംസ്കാരവും ശാസ്ത്രവും ഒന്ന് തന്നെയാണ്! നമുക്ക് അതിലേക്ക് വരാം.

ഇവിടെ സ്വാഗതം ആശംസിക്കുവാനായി നൽകിയ പനിനീർ പൂവിതളുകൾ സ്പർശിച്ചപ്പോൾ ഞാൻ ചിന്തിച്ചത് അതിലെ ശാസ്ത്രത്തെ കുറിച്ചാണ്. വൈകാരികമായി പനിനീർ പൂവിനെപ്പറ്റി എനിക്ക് സംസാരിക്കാം, എന്നാൽ ശാസ്ത്രീയമായി അതിനെ അപഗ്രഥിക്കാൻ ഞാൻ ആളല്ല. എങ്കിലും, ഈ  പനിനീർ പൂവിന്റെ ഇതളുകൾ മുഴുവൻ ശാസ്ത്രമാണ്, പരാഗണ ധർമത്തിന്റെ ശാസ്ത്രം, അതിനെ തേടി വണ്ടുകൾ വരുന്നതിന്റെ ശാസ്ത്രം, വണ്ടുകൾ പോലുള്ള ജീവികൾക്ക് അതിലിരിക്കാൻ പാകത്തിലുള്ള ബലം അതിൽ ഒരുക്കിയിരിക്കുന്നതിന്റെ ശാസ്ത്രം, ആ ചെടിക്കു താങ്ങാൻ കഴിയുന്നതും ആവശ്യം കഴിഞ്ഞാൽ കൊഴിഞ്ഞു പോകാൻ കഴിയുന്നറുമായ രീതിയിൽ പൂവ് ഒരുക്കപ്പെട്ടതിന്റെ ശാസ്ത്രം. അങ്ങനെ ചിന്തിക്കുമ്പോൾ ഓരോ ജീവിയിലും പ്രജനന തത്വം അടങ്ങിയിരിക്കുന്നു എന്നതിലെ ശാസ്ത്രം നമ്മെ വിസ്മയിപ്പിക്കുന്നു.

സാംസ്‌കാരിക നായകൻ എന്ന പദം എന്നെ അലോസരപ്പെടുത്തുന്നു. ഒന്ന് രണ്ടു കവിതകൾ കുത്തിക്കുറിക്കുന്ന ഒരാളെ സാംസ്‌കാരിക നായകൻ എന്ന് വിളിക്കാമോ? എന്നെ അങ്ങനെ വിളിക്കുമ്പോൾ ഞാൻ അസ്വസ്ഥനാകുന്നു. പണ്ടും നമുക്ക് സാംസ്‌കാരിക പ്രവർത്തകരുണ്ടായിരുന്നു, അവരെ നാം ഋഷികൾ എന്നാണ് വിളിച്ചിരുന്നത്. ഋഷി എന്ന വാക്ക് ഒരുപാട് രീതിയിൽ വായിക്കപ്പെടുന്നു: ഋഷി ഭർസകനാണ് - വിഷം ഉള്ളവൻ, കാണുന്നവനാണ് - അപൂർവ്വമായതിനെ കാണുന്നവൻ, സത്യം കണ്ടെത്തുവാൻ ശ്രമിക്കുന്നവനാണ് - ദീർഘദർശനം ഉള്ളവൻ. എല്ലാ സംസ്കാരങ്ങളിലും ഋഷിമാർ ഉണ്ട്, അവരെ വിദ്വാൻമാർ എന്നും നാം വിളിക്കുന്നു.

ഋഷി അല്ലാത്തവൻ കവിയല്ല, എല്ലാ ഋഷിമാരും കവികളാണ്, എല്ലാവർക്കും വേണ്ടി തത്വങ്ങൾ തേടുന്നവർ, അവൻ തന്നെയാണ് ശാസ്ത്രകാരൻ!

ഉദാഹരണത്തിന് ഋഗ്വേദത്തിലെ അസ്യ വാമസ്യ സൂക്തം കാവ്യാത്മകമായ ഒന്നാണ്, എന്നാൽ അതിൽ ജ്യോതിശാസ്ത്രം, ശരീരശാസ്ത്രം തുടങ്ങിയവയിലെ തത്വങ്ങൾ നമുക്ക് കാണാൻ കഴിയും. എനിക്ക് ഇപ്പോഴും അത് പൂർണ്ണമായും മനസ്സിലായിട്ടില്ല, ഞാൻ അത് വീണ്ടും വീണ്ടും പഠിക്കാൻ ശ്രമിച്ചുകൊണ്ടിരിക്കുന്നു.

ഭർതൃഹരിയുടെ രചനകളിൽ സൗന്ദര്യശാസ്ത്രവും ശരീരശാസ്ത്രവും ഇടകലർന്നു കിടക്കുന്നു. ഉദാഹരണത്തിന് സുന്ദരിയുടെ മുഖം ചന്ദ്രനെപ്പോലെ തിളങ്ങുന്നു എന്ന് പറയുമ്പോൾത്തന്നെ മൂക്കളയും തുപ്പലും അടങ്ങിയ തലയെക്കുറിച്ചും അദ്ദേഹം പരാമർശിക്കുന്നു. സ്തനങ്ങളെ ഭംഗിയുള്ള കുടങ്ങളോട് ഉപമിക്കുമ്പോഴും അവയിലെ ചലവും രക്തവും മാംസവും പ്രതിപാദ്യവിഷയമാകുന്നു. ഒരേസമയം വൈകാരികവും ശാസ്ത്രീയവുമായ ചിത്രം കോറിയിടുവാൻ അന്നത്തെ കവികൾക്ക് കഴിഞ്ഞിരുന്നു.

യാഥാർത്ഥത്തിൽ ശാസ്ത്രവും സംസ്കാരവും രണ്ടല്ല! നമ്മുടെ പഴമക്കാർ അതിനെ വേർതിരിച്ചു കണ്ടിരുന്നില്ല. അത് ഒരു കാഴ്ചപ്പാടിനെ വ്യത്യാസം കൂടിയാണ്. ഉദാഹരണത്തിന്, ചരിത്രം ഒരു ശാസ്ത്രമാണ്, ഇന്ന് ചരിത്രത്തെ ലോകം ഒരു ശാസ്ത്രമായി അംഗീകരിക്കുന്നു. പാശ്ചാത്യർ ചരിത്രത്തെ ദിവസങ്ങളുമായി ബന്ധിപ്പിക്കാൻ ശ്രമിച്ചു. പൗരസ്ത്യരായ നാമാകട്ടെ ചരിത്രത്തിൽ നിന്ന് സത്തകൾ മാത്രം സ്വാംശീകരിക്കാൻ ശ്രമിച്ചു, അതിനോട് ആപേക്ഷികമായ മാസങ്ങളും തീയതികളും ബന്ധിപ്പിക്കാൻ താത്പര്യം കാണിച്ചില്ല.

എല്ലാ ചിന്തയും ശാസ്ത്രമാണ്, അത് എന്തുമായി ബന്ധപ്പെട്ടതായാലും. ഭാഷ, സംഗീതം, പരിസ്ഥിതി, വ്യക്തി മനഃശാസ്ത്രം, ആനന്ദം ഇവയിലെല്ലാം ശാസ്ത്രമുണ്ട്. നമ്മുടെ അന്നം ശാസ്ത്രീയമാണ്. ചിന്തിച്ചു നോക്കുക ഒരു കുഞ്ഞിന് കൊടുക്കാവുന്ന ഏറ്റവും ശാസ്ത്രീയമായ അന്നം ഏതാണ്? അത് മുലപ്പാലാണ്! എന്നാൽ വിദ്യാസമ്പന്നയോ അല്ലാത്തവളോ ആയ ഒരു അമ്മ അവളുടെ കുട്ടിയെ, ഒരു ബീജകണത്തിൽ നിന്ന്, ഒരു കോശത്തിൽ നിന്ന് ഉരുവാക്കി, 270 ദിവസത്തോളം പേറി ഒരു കുഞ്ഞാക്കി, അതിനെ മുലപ്പാൽ ഊട്ടുമ്പോൾ അതിലെല്ലാമുള്ള ശാസ്ത്രത്തെ അറിയുന്നുണ്ടോ?

ശാസ്ത്രകാരൻ ഒരു തത്ത്വാന്വേഷിയാണ്, ഒരു കവിയാണ്. അബ്ദുൽകലാം ഒരു കവിയാണ്, അങ്ങനെ നമ്മുടെ പ്രഗത്ഭരായ ശാസ്ത്രകാരന്മാരെല്ലാം കവികളും കലാകാരന്മാരുമായ തത്ത്വാനേഷികളാണ്. ഭാഗവതത്തിലും, ഋഗ്വേദത്തിലും അങ്ങനെയുള്ള എല്ലാ സംസ്കാരങ്ങളുടെയും വേദങ്ങളിലും ശാസ്ത്ര തത്വങ്ങൾ പ്രതിഫലിക്കുന്നുണ്ട്.

ഒരു നല്ല സംഗീതജ്ഞൻ ഒരു സാമൂഹിക പരിഷ്കർത്താവാണ്, കഴിഞ്ഞുപോയ കാലങ്ങളെ തത്വങ്ങളായി ഉൾക്കൊണ്ട് നമ്മെ അനുഭവിപ്പിക്കുന്നവൻ. അവൻ സ്നേഹത്തിലൂടെ പ്രവർത്തിക്കുന്നു. അവനു ചുറ്റുമുള്ളതിനെയെല്ലാം അവൻ സ്നേഹിയ്ക്കുന്നു, അതിൽ നിന്ന് തത്ത്വങ്ങൾ ഉൾക്കൊണ്ടു തന്റെ കലാസൃഷ്ടികളിലൂടെ തലമുറകൾക്കു പകർന്നു നൽകുന്നു.

ബൈബിളിൽ ഉല്പത്തിയെ കുറിച്ച് പറയുമ്പോൾ പറയുന്നത് ദൈവം ഓരോ ദിവസവും അവന്റെ സൃഷ്ടി കർമത്തിന് ശേഷം അവന്റെ സൃഷ്ടിയെ നല്ലതായി കണ്ടു എന്നാണ്. അവൻ ഒന്നിനെയും ചീത്തയായി കണ്ടില്ല എന്നുകൂടി നാം മനസ്സിലാക്കണം.

ശ്രീനാരായണ ഗുരുവിന് വളരെ മുമ്പ് കുഞ്ചൻ നമ്പ്യാർ ശീതങ്കൻ തുള്ളൽ അവതരിപ്പിച്ചു. കീഴാളന്  പ്രവേശമില്ലാതിരുന്ന മേലാള ഇടങ്ങളിൽ കീഴാള വേഷത്തിൽ അദ്ദേഹം കടന്നു ചെന്ന് കീഴാളനെ അവതരിപ്പിച്ചു! അദ്ദേഹം നമ്മെ ചിരിപ്പിക്കുകയും ചൊടിപ്പിക്കുകയും ചെയ്‌തു, രണ്ടു രീതിയിലും അദ്ദേഹം സമൂഹത്തിൽ മാറ്റത്തിന്റെ വിത്ത് വിതച്ചു.

ശാസ്ത്രീയത തുടങ്ങുന്നത് ജീവിതത്തിലാണ്. അത് പടിഞ്ഞാറൻ വിദ്യാഭ്യാസത്തിലല്ല തുടങ്ങുന്നത്. അത് ഭാഗവതത്തിലും, ഭർതൃഹരിയുടെ രചനകളിലുമെന്നുവേണ്ട നമ്മുടെ ചുറ്റുമുണ്ട്. ശാസ്ത്രവും കലയും അർത്ഥവത്താകുന്നത് അത് സമൂഹത്തിൽ മാറ്റമുണ്ടാക്കുമ്പോഴാണ്.

ലഹരി ഉപയോഗം എന്നും ഉണ്ടായിരുന്നു. വേദ കാലത്തും, സംഘകാലത്തുമെല്ലാം അതുണ്ടായിരുന്നു. പക്ഷെ അന്നൊക്കെ അവയെ നിരീക്ഷിക്കാനുള്ള ചില മാർഗ്ഗങ്ങളും നില നിന്നിരുന്നു. ഒരു ഉദാഹരണം പറയാം.

ഗൗതമബുദ്ധനെ നശിപ്പിക്കാൻ പല മേലാളരും, വരേണ്യരും, ബ്രാഹ്മണരും ശ്രമിച്ചിരുന്നു. ബുദ്ധന്റെ തന്നെ അളിയൻ പോലും അദ്ദേഹത്തെ കൊല്ലാൻ നോക്കിയിരുന്നു. ഒരിക്കൽ ഒരു ഗണിക, താൻ കഴിഞ്ഞ രാത്രി ബുദ്ധനോടൊപ്പമായിരുന്നു എന്ന് അപവാദം പറഞ്ഞു. ബുദ്ധനൊഴികെ മറ്റുള്ളവരെല്ലാം, ഇന്നത്തെപ്പോലെ, അതിൽ അഭിപ്രായം പറഞ്ഞു. കുറച്ചു നാൾ കഴിഞ്ഞു, അവൾ ഒരു പൊന്തക്കാട്ടിൽ മരിച്ചു കിടന്നു. പലരും ബുദ്ധനെ സംശയിച്ചു. കുറെ നാൾ കഴിഞ്ഞ് ഒരു കള്ളു ഷാപ്പിൽ രണ്ടു പേർ ലഹരിയിൽ വഴക്കു തുടങ്ങി - ഒരാൾ നീയല്ലേ ആ ഗണികയെക്കൊണ്ട് ബുദ്ധനെക്കുറിച്ചു അപവാദം പറയിച്ചത് എന്നായി, മറ്റെയാൾ നീയല്ലേ അവളെ കൊന്നത് എന്നും. ലഹരിയിൽ ഈ രണ്ടു കള്ളങ്ങളും പൊളിഞ്ഞു. ഈ സംഭാഷണം രാജാവിന്റെ ചാരൻ രേഖപ്പെടുത്തുകയും രണ്ടു പേരും രാജസദസ്സിൽ വിചാരണക്ക് വിധേയരാകുകയും ചെയ്തു.

ലഹരി ഒരു തരംഗമാണ്. ശങ്കരാചാര്യർ സൗന്ദര്യ ലഹരി എന്നൊരു കൃതിക്ക് പേര് കൊടുത്തത് തന്നെ അതുകൊണ്ടാണ്. അഷ്ടാംഗ ഹൃദയത്തിൽ അമിത ലഹരി ഉപയോഗത്തിന്റെ ദൂഷ്യങ്ങളെക്കുറിച്ചു പറയുന്നുണ്ട്.

ലഹരി ഉപയോഗം കുറക്കാൻ ഭരണകൂടങ്ങൾക്ക് കാര്യമായി ഒന്നും ചെയ്യാൻ കഴിയുകയില്ല. കാരണം അതിനെ ചുറ്റി പണവും അധികാരവും ഉണ്ട്.

ലഹരി ഉപയോഗത്തിന് കുട്ടികളെ കുറ്റം പറയാൻ കഴിയില്ല. അവർക്ക് ചുറ്റും അതിന്റെ ലഭ്യതയും ആകർഷകതയും ഉണ്ടാക്കി വച്ചിരിക്കുന്നത് സമൂഹമാണ്. മദ്യാലയങ്ങൾ വിദ്യാലയങ്ങെളെക്കാൾ ആകർഷകങ്ങളാണ്. മാതാപിതാക്കൾക്ക് കൊതിയാണ്, തിന്നാനുള്ള കൊതി, നേടാനുള്ള കൊതി, അതിൽ നിന്നാണ് എല്ലാം തുടങ്ങുന്നത്. ഒരു വിദ്യാലയത്തിനടുത്ത് ഒരു സദ്യാലയം ഉണ്ടാകും, ഒരു സദ്യാലയത്തിനടുത്ത് ഒരു മദ്യാലയം ഉണ്ടാകും! അതാണ് സ്‌ഥിതി.

ആദ്യം നന്നാവേണ്ടത് വീടുകളാണ്, മാതാപിതാക്കളാണ്. ചീത്തയെ ത്യജിക്കാനും നല്ലത് ഭുജിക്കാനുമുള്ള വിവേക ബുദ്ധി ഉണ്ടാകേണ്ടത് വീടുകളിൽ നിന്നാണ്, അത് കാണിച്ചു കൊടുക്കേണ്ടത് മതാ പിതാക്കളാണ്‌. ഒരു പൂച്ച കവർ പാൽ കുടിക്കാൻ മുതിരുകയില്ല! ആ ജീവിക്ക് തനിക്ക് അഭികാമ്യമായ ഭക്ഷണത്തെ തിരിച്ചറിയാനുള്ള വിവേക ബുദ്ധിയുണ്ട്. മനുഷ്യന് അത് നഷ്ടപ്പെട്ടുകൊണ്ടിരിക്കുന്നു.

ഗാന്ധിയുടെ ജന്മം കൊണ്ട് ഏറ്റവും അനുഗ്രഹീതനായ ഒരു ജനതയാണ് നമ്മുടേത്. പക്ഷെ നാം എത്രമാത്രം അദ്ദേഹത്തെ അറിയുന്നു? ഒരു ചെറിയ കുട്ടിയായിരുന്നപ്പോൾ അദ്ധ്യാപകൻ മറ്റൊരു കുട്ടിയുടെ ഉത്തരം നോക്കി എഴുതാൻ ആവശ്യപ്പെട്ടപ്പോൾ അതിന്റെ ആവശ്യമില്ല എന്നും അത് തെറ്റാണെന്നും അദ്ദേഹം മനസ്സിലാക്കുകയും ധൈര്യത്തോടെ അതിനു വേണ്ടി നിലകൊള്ളുകയും ചെയ്തു. നമ്മുടെ കുട്ടികൾ അങ്ങനെയാകണം, അതിനു മാതാ പിതാക്കളും അദ്ധ്യാപകരും അവരെ ഒരുക്കണം.

1937 ൽ ഒരു ബിഷപ്പ് ഇന്ത്യ സന്ദർശനത്തിന് ശേഷം അമേരിക്കയിലെത്തി തന്റെ യാത്രയെക്കുറിച്ചു അവിടുത്തെ കുട്ടികളോട് വിവരിക്കുകയായിരുന്നു. അപ്പോൾ കുട്ടികൾ അദ്ദേഹത്തോട് താങ്കൾ ഗാന്ധിയെ കണ്ടോ എന്ന് ചോദിച്ചു. അന്നത്തെ ആ കുട്ടികൾക്കുള്ള ഗാന്ധിയെക്കുറിച്ചുള്ള ധാരണ നമുക്കുണ്ടോ?

ഞാൻ ആദ്യമായി രാജ്‌ഘട്ടിൽ പോയപ്പോൾ ദീപ ശിഖക്ക് മുന്നിൽ പ്രണമിക്കുകയായിരുന്നു. അപ്പോൾ കുറെ ചെറിയ കുട്ടികളുമായി ഒരു സ്കൂളിൽ നിന്നും ഒരു സംഘം അവിടെ എത്തി. ആരും ഒന്നും പറയാതെ ആ കുട്ടികൾ അവിടെ സാഷ്ടാംഗം പ്രണമിക്കുന്നത് ഞാൻ കണ്ടു. ആ കുട്ടികളുടെ മനസ്സിലെ ഗാന്ധിയെ നമുക്കറിയുമോ?

എനിക്ക് ചെന്നൈയിലെ ഒരു ചടങ്ങിൽ എന്റെ "ഗാന്ധി" എന്ന കവിത അവതരിപ്പിക്കാനുള്ള അവസരം ഉണ്ടായി. മിക്കവാറും എല്ലാ തെന്നിന്ത്യൻ ഭാഷകളിൽ നിന്നും കവികൾ അന്ന് മറീന ബീച്ചിൽ കവിതകൾ അവതരിപ്പിക്കാൻ എത്തിയിരുന്നു. കലൈഞ്ജർ കരുണാനിധിയും അതുപോലുള്ള പ്രമുഖരും നിറഞ്ഞ സദസ്സ്. ഞാൻ കവിത അവതരിപ്പിച്ചു കഴിഞ്ഞ ഉടനെ ചില പ്രമുഖർ വേദിയിലേക്ക് വന്ന് എന്നെ അഭിനന്ദിച്ചു. അതിലൊന്ന് ശെമ്മാങ്കുടി വൈദ്യനാഥ അയ്യർ ആയിരുന്നു, അദ്ദേഹം പറഞ്ഞു "എത്തിനൈ ഗാന്ധികൾ"! എസ്  പി ബാലസുബ്രഹ്മണ്യം, എം എസ് വിശ്വനാഥൻ തുടങ്ങിവരും അവരിലുണ്ടായിരുന്നു. മലയാളം അവർക്ക് എത്രമാത്രം അറിയാം എന്ന്  എനിക്കറിയില്ല, എന്നാൽ ഗാന്ധിജിയെ അവർ എത്രമാത്രം ബഹുമാനിക്കുന്നു എന്ന് എനിക്ക് അറിയാൻ കഴിഞ്ഞു. 

പുതിയ തലമുറയിലെ ഒരു എഴുത്തുകാരൻ തന്റെ ഒരു ഇംഗ്ലീഷ് പുസ്തകത്തിൽ എന്റെ ഈ കവിതയെ പരാമർശിക്കുകയുണ്ടായി. ബഹുമാന്യനായ മന്മഥൻ സാറാണ് എന്റെ കവിതയെക്കുറിച്ച് അദ്ദേഹത്തോട് പറഞ്ഞതത്രെ. അന്ന്  ശെമ്മാങ്കുടി പറഞ്ഞതുപോലെ എന്റെ കവിതയിൽ പല ഗാന്ധികളെ അദ്ദേഹത്തിനും കണ്ടെത്തനായി. അവരുടെ മനസ്സിലെ ഗാന്ധിയെ നമുക്കറിയുമോ?

ഗാന്ധിജിയെ കൂടുതൽ അറിഞ്ഞപ്പോൾ ഏത് വീക്ഷണ കോണിൽ നിന്ന് നോക്കിയാലും എനിക്ക് ഒരിക്കലും എത്തിപ്പെടാൻ പറ്റാത്ത ഉയരത്തിലാണ് അദ്ദേഹം എന്ന് ഞാൻ തിരിച്ചറിയുന്നു. ഇന്ന് നമ്മിൽ പലർക്കും ഗാന്ധിജി ഒരു വിമർശന വസ്തു മാത്രമാണ്. പക്ഷെ, ഞാൻ മുമ്പ് പറഞ്ഞവർക്കൊക്കെ അദ്ദേഹം അനുകരിക്കാനുള്ള ഉത്തമ മാതൃകയാണ്. നമുക്കും അങ്ങിനെയാകണം.

ഗാന്ധിയിലേക്കുള്ള തിരിച്ചുപോക്കാണ് നമ്മുടെ വഴി. ഗാന്ധി പ്രകൃതി സ്നേഹിയായ ഒരു ശാസ്ത്ര വാദിയായിരുന്നു, മനുഷ്യസ്നേഹത്തിനായിരുന്നു അദ്ദേഹത്തിന്റെ മുൻ‌തൂക്കം.ശാസ്ത്രത്തിന്റെ ഉപയോഗം അദ്ദേഹത്തിനെ പാതയിലാകണം.

ഗാന്ധിയെക്കുറിച്ച് വാചാലനായപ്പോൾ അദ്ദേഹത്തിന്റെ കണ്ണുകൾ നിറയുന്നുണ്ടായിരുന്നു, അത്രമാത്രം ഹൃദയത്തിൽ നിന്നായിരുന്നു ആ വാക്കുകൾ ഒഴുകി എത്തിയത്.

തുടർന്ന്: ഗാന്ധി എന്ന കവിതയുടെ ആദ്യവും അവസാനവും അദ്ദേഹം മനോഹരമായി ആലപിച്ചു. സദസ്സുമായി വിവിധ വിഷയങ്ങളിൽ സംവദിച്ചു.

രാജൻ ആയിരുന്നു അദ്ദേഹത്തെ സ്വാഗതം ചെയ്തത്. അദ്ധ്യക്ഷത വഹിച്ച പി എസ് ശ്രീകുമാർ, സമ്മേളന ശേഷം, അദ്ദേഹത്തിന് അകമഴിഞ്ഞ നന്ദി പ്രകാശിപ്പിച്ചു. പുതു തലമുറയിലെ പല കവികളും സാമൂഹിക പ്രതിബദ്ധതയില്ലാത്ത അലോസരപ്പെടുത്താത്ത കവിതകൾ താത്പര്യപ്പെടുമ്പോൾ മധുസൂദനൻ സാറിന്റെ കവിതകൾ സമൂഹത്തിന്റെ സംസ്കരണത്തിന് ഉതകുന്നവയാണെന്ന് അദ്ദേഹം പറഞ്ഞു. ഇനിയും ഒരുപാട് കവിതകൾ എഴുതണമെന്ന് അപേക്ഷിക്കുകയും ചെയ്തു.

ശാസ്ത്രവേദി സംസ്ഥാന സമ്മേളനം 2025: ഏപ്രിൽ 25 - 26,ലെനിൻ ബലവാടി, തിരുവനന്തപുരം.

ലഹരിയെ അടുത്തറിയാം

 എന്താണ് ലഹരി?

ഒരാൾ ഒരു പ്രത്യേക പെരുമാറ്റത്തിലോ, ഒരു പ്രത്യേക വസ്തുവിന്റെ ഉപയോഗത്തിലോ അമിത ആസക്തി കാണിക്കുന്നുണ്ടെങ്കിൽ അത് അയാളുടെ ലഹരിയാണ് എന്ന് നമുക്ക് ചുരുക്കത്തിൽ നിർവ്വചിക്കാം.

നമ്മുടെ തലച്ചോർ പാരിതോഷികങ്ങളുടെ അടിസ്ഥാനത്തിലാണ് പ്രവർത്തിക്കുന്നത്. ന്യൂറോട്രാൻസ്മിറ്റർസ് എന്ന് പൊതുവെ വിളിക്കപ്പെടുന്ന രാസവസ്തുക്കളായാണ് തലച്ചോറിന് പാരിതോഷികങ്ങൾ നൽകപ്പെടുന്നത്. പാരിതോഷികങ്ങൾ മാത്രമല്ല ഭീഷണികളും ജാഗ്രത നിർദ്ദേശങ്ങളുമെല്ലാം തലച്ചോറിലെത്തുന്നത് ഇത്തരം രാസവസ്തുക്കളായിട്ടാണ്! പാരിതോഷികങ്ങളായ രാസവസ്തുക്കൾ തലച്ചോറിലെത്തുമ്പോൾ നാം പൊതുവിൽ സുഖം അനുഭവിക്കുകയോ സുഖം ഉണ്ടാകാൻ പോകുന്നു എന്ന പ്രതീക്ഷ നമ്മിൽ ഉണ്ടാകുകയോ ചെയ്യുന്നു.

മൂന്നു തരം ലഹരികൾ!

• പ്രവർത്തികൾ ഉളവാക്കുന്ന ലഹരി: ഒരു പ്രത്യേക പ്രവർത്തി ശരീരത്തിന് സുഖം തരുന്നു എങ്കിൽ, നാം മനസ്സിലാക്കേണ്ടത് അത് ചെയ്യുമ്പോൾ നമ്മുടെ ശരീരം പാരിതോഷികങ്ങൾ (തലച്ചോറ് പാരിതോഷികങ്ങളായി കരുതുന്ന രാസവസ്തുക്കൾ), തലച്ചോറിൽ എത്തിക്കുന്നു എന്നാണ്! വിവിധതരം കളികൾ, വ്യായാമം, ചൂതാട്ടം, സമൂഹ മാധ്യമങ്ങളിൽ നിന്നും കിട്ടുന്ന പ്രതികരണങ്ങൾ, അശ്ലീലത, പ്രത്യുത്പ്പാദനം, കൃഷി, കണ്ടെത്തുലുകൾ, ഗവേഷണം, നിർമ്മാണം, എഴുത്ത്, വായന, വിമർശനം, ചിത്രരചന, പാട്ട്, കല, പാചകം, യാത്ര, ചിട്ടകൾ, സാമൂഹിക കൂട്ടായ്മകൾ (രാഷ്ട്രീയം, മതം, ദേശം, ഭാഷ,..), തമാശ, കുത്തിത്തിരിപ്പ്, പൊങ്ങച്ചം, പരദൂഷണം, എന്നിങ്ങനെ പലതരം പ്രവർത്തനങ്ങൾ നമ്മുടെ ശാരീരിക മാനസിക സാഹചര്യങ്ങൾക്കനുസരിച്ച് സുഖം പ്രദാനം ചെയ്യുന്ന ന്യൂറോട്രാൻസ്മിറ്റർസ് ശരീരത്തിൽ ഉണ്ടാക്കുന്നു. നമ്മുടെ ബോധത്തെ അത് തകിടം മറിക്കാത്തിടത്തോളം, ഇതിനെ പൊതുവിൽ ഒരു സ്വാഭാവിക പ്രക്രിയയായി കണക്കാക്കാം. മാത്രമല്ല, നമ്മെ  ക്രിയാത്മകമാക്കുന്നത് തന്നെ സന്തുലിതമായി ഇത്തരം രാസവസ്തുക്കൾ ഉത്പാദിപ്പിക്കാനുള്ള നമ്മുടെ കഴിവാണെന്നും നാം മനസ്സിലാക്കണം.

• ഉപയോഗം മൂലമുള്ള ലഹരി: ചില വസ്തുക്കളുടെ ഉപയോഗം മൂലവും ശരീരം ഇത്തരം ന്യൂറോട്രാൻസ്മിറ്റർസ് ഉത്പാദിപ്പിക്കുന്നുണ്ട്. മദ്യം പോലെ വായിലൂടെ കഴിക്കുന്ന ചില വസ്തുക്കളും, കഞ്ചാവ് പോലെ (പുകവലിയിലൂടെ) ശ്വാസം വഴി ശരീരത്തിലെത്തുന്ന ചില വസ്തുക്കളും, തൊലിപ്പുറത്തു പുരട്ടുന്ന ചില വസ്തുക്കളും ശരീരത്തിന് സുഖം തോന്നിപ്പിക്കുന്ന ന്യൂറോട്രാൻസ്മിറ്റർസ് ഉണ്ടാക്കുവാൻ അതിനെ പ്രേരിപ്പിക്കുന്നു എന്ന് നമുക്ക് കാണാം. ഒരുപക്ഷെ, പ്രകൃതിയോട് പഞ്ചേന്ദ്രിയങ്ങളിലൂടെ സംവദിക്കാനും, കൊതി, സുരക്ഷിതത്വം, പ്രതീക്ഷ തുടങ്ങിയ വികാരങ്ങൾ നമ്മിൽ ഉണ്ടാക്കുവാനും വേണ്ടി നമ്മിൽ നിലനിൽക്കുന്ന അനുകൂലനങ്ങളാവാം ഇത്തരം ശേഷികൾ.

• കൃത്രിമ ലഹരി: ശാസ്ത്രത്തിന്റെ വികാസവും ന്യൂറോട്രാൻസ്മിറ്റർസ് എങ്ങിനെ പ്രവർത്തിക്കുന്നു എന്ന അറിവും, വൈദ്യശാസ്ത്ര രംഗത്ത് അതിന്റെ പ്രയോഗവും, പഞ്ചേന്ദ്രിയങ്ങൾ വഴിയല്ലാതെ അവയെ തലച്ചോറിലെത്തിക്കാനുള്ള കൃത്രിമ വഴികൾ തുറന്നിടുന്ന കാഴ്‌ചയാണ് ഈ നൂറ്റാണ്ടിൽ നാം കണ്ടുകൊണ്ടിരിക്കുന്നത്. പല രോഗികൾക്കും വലിയ അനുഗ്രഹമാണ് ഈ കണ്ടെത്തലുകളും സങ്കേതങ്ങളും.

ലഹരി അടിമത്തം

ഒരാൾ ലഹരി ഒഴിവാക്കാൻ പറ്റാത്ത അവസ്ഥയിൽ എത്തിച്ചേരുകയും, അതിനുവേണ്ടി പ്രധാനപ്പെട്ട മറ്റു കാര്യങ്ങൾ ഒഴിവാക്കുകയും ചെയ്യുമ്പോൾ, പൊതുവെ അയാൾ ലഹരി അടിമത്തത്തിനു ഇരയാകുന്നു എന്നും നമുക്ക് കരുതാം. അങ്ങിനെ, അതിനോടുള്ള വിധേയത്വം അയാളെ മറ്റു പ്രവർത്തികളിൽ നിന്നും അകറ്റി നിർത്തുകയോ, സമൂഹത്തിന്റെ പൊതു ധാരണകൾക്ക് എതിരായി പ്രവർത്തിക്കാൻ പ്രേരിപ്പിക്കുകയോ, മറ്റുള്ളവർക്ക് ബുദ്ധിമുട്ട് ഉണ്ടാക്കുകയോ, കൂടുതൽ പേരെ ലഹരിക്ക് അടിമപ്പെടുത്തുകയോ ഒക്കെ ചെയ്യുമ്പോൾ ലഹരി അടിമത്തം ഒരു സാമൂഹിക പ്രശ്നമായി മാറുന്നു.

സ്വാഭാവിക ലഹരികളോടുണ്ടാകുന്ന അസ്വാഭാവിക അടിമത്തവും കൃത്രിമ ലഹരികളുടെ വൈദ്യശാസ്ത്രത്തിന് വെളിയിലുള്ള ഉപയോഗത്തിലുണ്ടായിട്ടുള്ള അഭൂതപൂർവ്വകമായ വർദ്ധനയുമാണ് നമ്മുടെ നിലനിൽപ്പിനെ തന്നെ ചോദ്യം ചെയ്യുന്നത്. കൃത്രിമ ലഹരി, ജീവനോ പ്രകൃതിക്കോ ഇണങ്ങാതെ വെറും ഉന്മാദത്തിനായി, ഇന്ന് വ്യാപകമായി ഉപയോഗിക്കപ്പെടുന്നു. പഞ്ചേന്ദ്രിയങ്ങളുടെ സഹായം കൂടാതെ തലച്ചോറിലെത്തുന്നതിനാൽ, ശരീരത്തിന് ഇവയുടെ മേൽ ഒരു നിയന്ത്രണശേഷിയുമില്ല, അടിമപ്പെടുന്നതിൽ നിന്ന് തലച്ചോറിനെ സംരക്ഷിക്കാൻ ശരീരം അശ്ശ്ക്തമാകുന്ന കാഴ്ചയാണ് നാം കാണുന്നത്.

ജന്മനാ തലച്ചോറിന്റെ പ്രവർത്തനത്തിലും രാസ സംവേദനത്തിലുമുള്ള അസ്വാഭാവികതകളാണ് ഓട്ടിസം (ASD) പോലുള്ള അവസ്ഥകൾക്ക് കാരണം. അമിതവും അസ്വാഭാവികവും കൃത്രിമവുമായ ലഹരി ഉപയോഗം മൂലമുണ്ടാകുന്ന അടിമത്തം നമ്മെ ഏതാണ്ട് അതിനു സമാനമായ അവസ്ഥയിലാണ് എത്തിക്കുന്നതെന്ന് നാം തിരിച്ചറിയേണ്ടതുണ്ട്.

ലഹരിയേയും ലഹരി അടിമത്തത്തെയും നാം രണ്ടായിത്തന്നെ മനസ്സിലാക്കേണ്ടതുണ്ട്.

ഒരുപക്ഷെ അടിമത്തത്തെ മറ്റു ചെറു ലഹരികൾ കൊണ്ട് തന്നെ ഫലപ്രദമായി നേരിടാൻ കഴിഞ്ഞേക്കാം. സുരക്ഷിത ലഹരികൾ തിരഞ്ഞെടുക്കുന്നതിന്, പ്രധാന ന്യൂറോട്രാൻസ്മിറ്റർസ് ഏതൊക്കെയാണെന്നും, അവ സ്വാഭാവികമായി ഉണ്ടാകുന്ന സാഹചര്യങ്ങളുടെ സ്വഭാവമെന്താണെന്നും അറിയുന്നത് തീർച്ചയായും ഗുണകരമാകും.

ന്യൂറോട്രാൻസ്മിറ്റർസ് (neurotransmitters)

നമ്മുടെ തലച്ചോറിനെ ഉപമിക്കാവുന്നത് ഒരു തിരക്കേറിയ നഗരത്തോടാണ്. നഗരം മുഴുവൻ വിവിധ തൊഴിലുകളിൽ ഏർപ്പെട്ടിരിക്കുന്ന ആളുകൾ (ന്യൂറോണുകൾ), അവർ പരസ്പരം വിവിധ തരം സന്ദേശങ്ങൾ കൈമാറിക്കൊണ്ട് ഇടപഴകുന്നു - വിചാരങ്ങൾ, വികാരങ്ങൾ, അങ്ങിനെ പലതും. ഓരോ ആളും നമ്മുടെ ശരീരത്തിന്റെ പല ഭാഗങ്ങളുടെ പ്രതിനിധികളാണെന്നു കരുതുക. അവർ സന്ദേശങ്ങൾ കൈമാറ്റം ചെയ്യുന്നത് ന്യൂറോട്രാൻസ്മിറ്റർസ് എന്ന പ്രത്യേക രാസവസ്തുക്കളുടെ ഭാഷയിലാണെന്ന് ചിന്തിക്കുക. അങ്ങിനെ നോക്കുമ്പോൾ ആ നഗരത്തിലെ ഓരോ ആളും സന്ദേശ വാഹകരാണ്!

ഓരോ ന്യൂറോട്രാൻസ്മിറ്റർസ് സന്ദേശത്തിന്റെയും ആയുസ്സിൽ മൂന്ന്  ഘട്ടങ്ങൾ ഉള്ളതായി നമുക്ക് കരുതാം.

• തലച്ചോർ നാം കഴിക്കുന്ന ഭക്ഷണത്തിൽ നിന്നുള്ള രാസവസ്തുക്കൾ ഉപയോഗിച്ച് ന്യൂറോട്രാൻസ്മിറ്റർസിനെ നിർമ്മിക്കുന്നു, ഇതാണ് ഒന്നാം ഘട്ടം. ഇതിനായി ചെറു അടുക്കളകളായി പ്രവർത്തിക്കാൻ കഴിയുന്ന എൻസൈമുകൾ അവിടെ ഉണ്ട്.
• രണ്ടാം ഘട്ടം സന്ദേശങ്ങൾ അയക്കലാണ്, തലച്ചോറിന് നാഡികൾ വഴി ലഭിക്കുന്ന ചെറു വൈദ്യുത നിർദ്ദേശങ്ങൾക്കനുസരിച്ച് അടുക്കളയിൽ നിന്നും വിവിധ സന്ദേശവാഹകർ വഴി സന്ദേശങ്ങൾ തലച്ചോറിൽ ചുറ്റിക്കറങ്ങുന്നു. ഈ ചുറ്റിക്കറക്കം പ്രതീക്ഷയുടെ ന്യൂറോട്രാൻസ്മിറ്റർസുമായാണെങ്കിൽ നമുക്ക് സന്തോഷം തോന്നുന്നു.
• ആവശ്യത്തിന് ശേഷം സന്ദേശങ്ങളെ തിരിച്ചു പിടിച്ച് അടുക്കളയിലെത്തിക്കുക എന്നതാണ് മൂന്നാമത്തെ ഘട്ടം. അവമൂലമുള്ള കുഴപ്പങ്ങൾ ഒഴിവാക്കാനുള്ള ഒരുതരം ചവറുകോരൽ പോലെ, അവയെ വീണ്ടും ഉപയോഗിക്കുകയും ചെയ്യും

നൂറു കണക്കിന് ന്യൂറോട്രാൻസ്മിറ്റർസിനെ ശാസ്ത്രം തിരിച്ചറിഞ്ഞിട്ടുണ്ട്. അവയിൽ പ്രധാനപ്പെട്ട ചിലതിനെ പരിചയപ്പെടാം:

• ഡോപാമൈൻ (Dopamine)

പ്രതിഫലം, ആനന്ദം, പ്രചോദനം എന്നീ തോന്നലുകൾ ഉളവാക്കുന്നു. ആസക്തി, ശ്രദ്ധ, ചലനം തുടങ്ങിയവയിൽ നമുക്ക്  "സുഖം തോന്നുന്നത്" ശരീരം ഇത് ഉണ്ടാക്കുന്നതുകൊണ്ടാണ്.  ഉദാഹരണം: ബിരിയാണി പോലെ ഇഷ്ടപ്പെട്ട രുചികരമായ ഭക്ഷണം കഴിക്കുമ്പോൾ "അടിപൊളി" എന്ന് തോന്നുന്നത് ഇത് ഉണ്ടാകുന്നത് കൊണ്ടാണ്. ഇതിൻറെ ഉത്പാദനം കുറഞ്ഞാൽ പാർക്കിൻസൺസ് പോലെയുള്ള അസുഖങ്ങൾ  വരാം.

• സെറോട്ടോണിൻ (Serotonin)

മാനസികാവസ്ഥ, ഉറക്കം, വിശപ്പ് എന്നിവയെ  നിയന്ത്രിക്കുന്നു. തലച്ചോറിൽ ഇതിൻറെ അളവ് കൂടുമ്പോൾ നാം ശാന്തരും സംതൃപ്തരുമാകുന്നു. ഉദാഹരണം: രാവിലെ സൂര്യപ്രകാശം ഏൽക്കുന്നത് നമ്മുടെ മാനസികോല്ലാസം വർദ്ധിപ്പിക്കുന്നത് ഇത് ഉണ്ടാകുന്നത് കൊണ്ടാണ്. ഇതിൻറെ ഉത്പാദനം കുറയുന്നത് വിഷാദത്തിലേക്കോ ഉത്കണ്ഠയിലേക്കോ നയിച്ചേക്കാം.

• നോറെപിനെഫ്രിൻ / നോറാഡ്രിനാലിൻ (Norepinephrine / Noradrenaline)

ജാഗ്രത, ഉത്തേജനം, പോരാട്ടവീര്യം, പ്രതികരണം എന്നിവയെ  നിയന്ത്രിക്കുന്നു. ശാരീരിക/മാനസിക സമ്മർദ്ദങ്ങൾ ഉള്ളപ്പോൾ ശ്രദ്ധയും ഊർജ്ജവും വർദ്ധിപ്പിക്കാൻ ശരീരം ഇത് ഉണ്ടാക്കുന്നു. ഉദാഹരണം: വിരസമായ സമയത്ത് വേഗതയേറിയ ഒരു  നടത്തമോ  ഒരു ചെറു ജോഗിംഗോ നമുക്ക് ഉണർവ്വ് ഉണ്ടാക്കുകയും നമ്മുടെ ശ്രദ്ധ വർദ്ധിപ്പിക്കുകയും ചെയ്യുന്നുത് ഇത് ഉണ്ടാകുന്നത് കൊണ്ടാണ്.

• എപിനെഫ്രിൻ (Epinephrine / Adrenaline)

ശാരീരിക/മാനസിക പിരിമുറുക്കം ഉള്ളപ്പോൾ തലച്ചോറിന് വെളിയിലുള്ള ശരീരത്തിന്റെ പ്രതികരണങ്ങളെ നിയന്ത്രിക്കുന്നു. ഇത് നോറെപിനെഫ്രിനു സമാനമായ ന്യൂറോട്രാൻസ്മിറ്ററാണെങ്കിലും ഒരു ഹോർമോൺ ആയി കണക്കാക്കുന്നു. ഉദാഹരണം: പെട്ടെന്നു ഒരു വലിയ ശബ്ദം കേൾക്കുമ്പോൾ നമുക്ക് ഭയം ഉണ്ടാകുന്നതുംനമ്മുടെ ഹൃദയമിടുപ്പ് വർധിക്കുന്നതും ഇതിന്റെ ഉത്പാദനം കാരണമാണ്.

• ഗാബ (GABA - Gamma-Aminobutyric Acid)

ഇത് തലച്ചോറിന്റെ പ്രവർത്തനത്തെ മന്ദീഭവിപ്പിക്കുക വഴി നമ്മെ ശാന്തമാക്കുകയും, ഉത്കണ്ഠ കുറയ്ക്കുകയും, ഉറങ്ങുവാൻ സഹായിക്കുകയും ചെയ്യുന്നു. ഇതിനെ ശാന്തതക്കുള്ള ഒറ്റമൂലി എന്ന് വിളിക്കപ്പെടുന്നു! ഉദാഹരണം: പിരിമുറുക്കമുള്ള സമയത്തു ആഴത്തിൽ ശ്വാസം എടുക്കുന്നതോ ഒരു നിമിഷം നിശബ്ദമായി ഇരിക്കുന്നതോ  നമ്മെ ശാന്തമാക്കുന്നത് ഇതിൻറെ ഉത്പാദനം മൂലമാണ്.

• ഗ്ലൂട്ടാമേറ്റ് (Glutamate)

തലച്ചോറിന്റെ പ്രവർത്തനങ്ങൾക്ക് ഉത്തേജനം നൽകുന്നു. പഠനം, ഓർമ്മശക്തി തുടങ്ങിയ എല്ലാ ബുദ്ധിപരമായ പ്രവർത്തനങ്ങൾക്കും സഹായിക്കുന്നു. ഉദാഹരണം: നാം ഒരു പുതിയ കാര്യം പഠിക്കുമ്പോൾ  നമ്മുടെ തലച്ചോറിലെ ചാലകങ്ങളെയും  ന്യുറോണുകളെയും ഉത്തേജിപ്പിക്കാനായി ഇത് ഉത്പാദിപ്പിക്കപ്പെടുന്നു. പക്ഷെ, ഇത് ശരീരത്തിൽ കൂടുതലായാൽ കോശങ്ങളെ അമിതമായി ഉത്തേജിപ്പിക്കുക വഴി അവയുടെ നാശത്തിന് കാരണമാകുകയും ചെയ്യാം. 

• അസറ്റൈൽകോളിൻ (Acetylcholine)

പേശികളുടെ ചലനം, ഓർമ്മശക്തി, ശ്രദ്ധ എന്നിവയെ നിയന്ത്രിക്കുന്നു. പെരിഫറൽ നാഡീവ്യവസ്ഥയിലും (പേശികളുടെ സങ്കോച-വികാസങ്ങൾ) തലച്ചോറിലും ഇതിന്റെ സ്വാധീനം വലുതാണ്. ഉദാഹരണം: സുഡോക്കോ പോലുള്ള ഒരു മെമ്മറി ഗെയിം കളിക്കുമ്പോൾ നമ്മുടെ  മനസ്സ്  കൂർമ്മതയുള്ളതും ഉണർവ്വുള്ളതുമായി  നിലനിൽക്കുന്നത് ഇതിൻറെ ഉത്പാദനം മൂലമാണ്. ഇതു കുറഞ്ഞാലും അൽഷിമേഴ്സ് വരാം.

• ഹിസ്റ്റാമിൻ (Histamine)

ഉണർവ്, വിശപ്പ്, രോഗപ്രതിരോധ ശേഷി എന്നിവയെ സ്വാധീനിക്കുന്നു. ഉദാഹരണം: ഒരു നല്ല കാപ്പിയുടെ മണം നമ്മെ ഉന്മേഷഭരിതരാക്കുന്നത് ഇതിൻറെ ഉത്പ്പാദനം മൂലമാണ്.ആന്റി-ഹിസ്റ്റാമൈനുകൾ നമ്മെ മയക്കത്തിലാക്കുന്നത്, അവ ജാഗ്രതാ നിർദ്ദേശങ്ങളെ തടയുന്നുകൊണ്ടാണെന്ന് ഓർക്കുക.

• എൻഡോർഫിനുകൾ (Endorphins)

ഇതിൻറെ സാന്നിദ്ധ്യം വ്യായാമം ചെയ്യുമ്പോൾ വേദന തടയുകയും സമ്മർദ്ദം ഉള്ളപ്പോൾ ആശ്വാസം നൽകുകയും  ചെയ്യുന്നു. ഉദാഹരണം: രസകരമായ ഒരു സിനിമ കണ്ട് ചിരിക്കുമ്പോൾ വേദന മറക്കുകയോ  പിരിമുറുക്കം കുറയുകയോ ചെയ്യുന്നത് ഇത് ഉണ്ടാകുന്നത്കൊണ്ടാണ്. സാങ്കേതികമായി ഇവ ന്യൂറോപെപ്റ്റൈഡുകൾ (ന്യൂറോട്രാൻസ്മിറ്ററുകളെക്കാൾ  നീണ്ടു നിൽക്കുന്ന സന്ദേശങ്ങൾ) ആണ്.

• ഓക്സിടോസിൻ (Oxytocin)

ബന്ധങ്ങൾ, വിശ്വാസം, സാമൂഹിക പെരുമാറ്റം, പ്രത്യുത്പ്പാദനം, ദയ, സഹാനുഭൂതി എന്നിവയെ നിയന്ത്രിക്കുന്നു. ഉദാഹരണം: ഒരു സുഹൃത്തിനെയോ വളർത്തുമൃഗത്തെയോ കെട്ടിപ്പിടിക്കുമ്പോൾ നമുക്കുണ്ടാകുന്ന ഊഷ്മളത ഇത് ഉണ്ടാകുന്നതിനാലാണ്. ഇത് തലച്ചോറിൽ ഒരു ന്യൂറോട്രാൻസ്മിറ്ററായി പ്രവർത്തിക്കുന്നു, തലച്ചോറിന് വെളിയിൽ ഒരു  ഹോർമോണായും.

• സബ്സ്റ്റൻസ് പി (Substance P)

വേദനയെക്കുറിച്ചുള്ള ധാരണയും പിരിമുറുക്കമുള്ളപ്പോഴുള്ള പ്രതികരണങ്ങളും കൈകാര്യം ചെയ്യാണ് സഹായിക്കുന്നു. ഇത് നമ്മുടെ നാഡീവ്യവസ്ഥയിലെ "അയ്യോ" സന്ദേശമാണ്. ഉദാഹരണം: ഒരു എരിവുള്ള മുളക് കടിക്കുമ്പോൾ നമുക്ക് ഒരു ചെറിയ ആധി തോന്നുന്നത് ഇത് ഉണ്ടാകുന്നത് കൊണ്ടാണ്.

• ഗ്ലൈസിൻ (Glycine)

ഇത് ചലന നിയന്ത്രണത്തിനും നാഡികളെ ശാന്തമാക്കുന്നതിനും സഹായിക്കുന്നു. ഉദാഹരണം: കിടക്കുന്നതിന് മുമ്പ് മൂരിനിവർത്തുമ്പോൾ നമുക്ക് ആശ്വാസം തോന്നുന്നത് ഇത് ഉണ്ടാകുന്നത് കൊണ്ടാണ്. തലച്ചോറിന് പുറമെ സുഷുമ്നാ നാഡിയിലും ഇത് കാണപ്പെടുന്നു.

സ്വാഭാവിക പ്രതിരോധം

ശ്രദ്ധിക്കൂ? ഒരു ചിരിക്ക് ഒരു നല്ല ഉത്തേജനം നല്കാൻ കഴിവുണ്ട്, ഒരു നല്ല ഭക്ഷണത്തിന് ഏത് സന്ദർഭത്തിലും നമ്മെ സന്തോഷിപ്പിക്കാൻ കഴിവുണ്ട്, നല്ല ഒരു തമാശക്ക് എത്ര കുഴഞ്ഞുമറിഞ്ഞ അവസ്ഥയും തരണം ചെയ്യാൻ നമ്മെ പ്രാപ്തരാക്കാൻ കഴിവുണ്ട്!

ലഹരി അടിമത്തത്തിൽ എത്തിപ്പെടാതെ രക്ഷപ്പെടുവാൻ, സന്തുലിതമായ സ്വാഭാവിക ലഹരികളുണ്ടാക്കുന്ന പ്രവർത്തികളെത്തന്നെ ആശ്രയിക്കുക എന്നത് ഒരു സാധ്യതയാണ്. വളരെ ലളിതമായി പറഞ്ഞാൽ, നമുക്ക് ചുറ്റുമുള്ള കൊച്ചു കൊച്ചു സന്തോഷങ്ങൾ കണ്ടെത്താനും അതിൽ സുഖം കണ്ടെത്താനും നാം ശീലിക്കേണ്ടതുണ്ട്. പ്രകൃതി നമുക്കുചുറ്റും ഒരുക്കിവച്ചിരിക്കുന്ന മായിക പ്രപഞ്ചത്തിലേക്കൊന്ന് ശ്രദ്ധിച്ചാൽ തന്നെ മറ്റൊരു ലഹരിയും നമുക്കാവശ്യമില്ല എന്ന് ബോദ്ധ്യപ്പെടും.

നമ്മുടെ തലച്ചോറിന് നമ്മെ സന്തോഷഭരിതരാക്കാൻ മികച്ച തന്ത്രങ്ങളുള്ളപ്പോൾ, നാമെന്തിന് മയക്കുമരുന്നുകൾക്ക് പിറകെ പോകണം?

നന്ദി 🙏

ശാസ്ത്രവേദിയുടെ ശാസ്ത്രം മുന്നോട്ട് എന്ന മാഗസിൻറെ ഏപ്രിൽ 2025 ലക്കത്തിന് വേണ്ടി തയ്യാറാക്കിയത്.  ഉള്ളടക്കം തയ്യാറാക്കുന്നതിന് Grok AI ഉപയോഗിച്ചിട്ടുണ്ട്, ചിത്രം Chat GPT ഉപയോഗിച്ച് ഉണ്ടാക്കിയതാണ്. ശാസ്ത്രവേദിക്കും Grok AI ക്കും Chat GPT ക്കും നന്ദി.

• https://sasthravedhi.in/
• https://x.ai/grok
• https://chatgpt.com/